عاااجل : بوقرة أحسن مدافع في العالم - لا كانافارو و لا هم يحزنون

السلام عليكم

ها نحن اخواني الكرام في نهاية الموسم الكروي 2008-2009 عبر الملاعب الاروبية و الجزائرية

أردت أن أسجل بعض النقاط حول لاعبينا هنا و هناك

و سيكون الترتيب حسب تميز لاعبينا :

-1-
مجيد بووووقرة

و الله بكل صراحة هذا اللاعب أحسن و أقوى لاعب رأيته في حياتي : و الله بدون مجاملة

و أعتقد أنه بعد سنة أو سنتين إذا ما انتقل إلى المان يونايتد أو البارصا سيفتك اللقب بكل سهولة

خاوتي مانيش نخرط و لا نتفلسف

كانافارو احسن لاعب في العالم ؟؟؟

بكل جدية و بعيدا عن الانتماء

بوقرة أحسن من كانافارو 6000 مرة : و نزيد نقول مانيش نتفلسف ولا نخرط

إلى كل من تابع لقاءات بوقرة : أنا شخصيا شفتو من البداية للنهاية من اول لقاء

كان - و الله العظيم - حجرة واقفة لا انت و لا غيرك يقدر يفوت

و زيد : أداء هجومي راق جدا

أخططاء تكاد تكون منعدمة تماما : ثقة في النفس

حتى أن جماهير غلاسكو قالت بأن بوقرة : هبة من الله -

و كانوا يقصدوا بأن مستوى بوقرة أكبر من غلاسكو حتى

... نعاودها و نقولها : لو كنا نملك واحد آخر مثل بوقرة في الدفاع نضمنلكم في 10 ماتشات ما يدخلش اكثر من 1 هدف واحد

هذا إذا دخل أصلا ...


-2-
كريم متمور

لاعب رائع رائع رائع : أنا من عشاق الدوري الالماني : دوري فيه كلشي بالون جمهور كبيييييير جدا

متمور أدى مقابلات فوق القمة لكن المشكل في : الفريق تاعوا

بوروسيا منشلدباخ ضعيف بزاف و غير متمور لي يلعب صح الباقي كامل يخرطوا

+ عندهم حارس مليح لكن الدفاع تقول دفاع بير فرهوش ؟؟؟؟


-3-
نذير بلحاج

أدى مستوى رائع مع بورتسموث .. لكن ما أعيبه على بلحاج

أنه في بورتسموث جدي و يخاف على بلاصتو و يلعب كي المسطرة

أما عندنا فحاط روحو هو كلشي و أنو بلاصتو بالبيبا و يحكم لابال بزاف و يتنارفا بزاف ؟؟؟ فهمتوني واش حاب نقول


-4-
عامر بوعزة

يا سبحان الله اللاعب الجزائري الوحيد الذي يلعب الكرة الانجليزية بحذافيرها تسديدات من خارج ال18 طول القاء : ثقة في النفس و أداء رااائع

مبروك عليك يا بوعزة الصعود العام الجاي كونتر منشستر عاودلهم هاداك البيت الهدة و الحطة و خلي لاديفونس تتفرج


-5-
ياسين بزاز

بيناتنا خاوتي تطير تنزل هو السبب الوحيد في تأهل الخضر للدور الأخير

يعني بالعامية

كون ماجاش هو رانا فالبير

هو رجل القاء تاع السنغال بيه رجعنا

هدف + تمريرة هدف = يكثر الف خيرك يا بزاز جزايري و نص

و باين تلعب عالبلاد و تحب تفرح ولاد بلادك §!!!! مشكور ستين الف مرة يا بزاز

ان شاء الله برك عين سعدان ما تعماش عليك على خاطر راك احسن من بعض اللاعبين لي راهم يزغدوا حاليا


-6-
عمري شاذلي


أيايايا هاذ اللاعب و الله يستاهل بلاصتو و يحكمها بالبيبا لاعب خلوق يحب بلادو و ديما فالقلب ماشي كيما ....

ان شاؤء الله سعدان ما يعماش عليك و نشوفوك معانا



-7-
كريم زياني

بدون تعليق : كان نجم .. بقي نجم : لكنه تراجع كثيرا

و ما تقولوليش الإصابة ؟؟؟

على خاطر باين في لعبوا أصبح قليل الحركة كثير التخلات الخاطئة

لكنه يبقى في قلوبنا مايسترو و ان شاء الله يعكس كلامي و يثبت ذلك في مباراة مصر



-8-
عنتر يحيا

سبحان الله اللاعب الوحيد الذي يؤدي مع الفريق الوطني أحسن ما يؤدي مع ناديه

و الكل لاحظ ذلك : مع بوخوم شوية ناقص مي مع الخضر يعطيك الصحة يا عنتر يحيا راك فوووووور و ربي يخليك لينا





.... البقية انقسمت بين حسن متوسط و ضعيف و - تقدر تقول بلاصتهم ماشي مع البالون خلاص -


و لكم الحكم ...


في الاخير كرأي متابع دائم للفريق الوطني

و الأعضاء لي يعرفوني ههنا عارفين مريض بيها

لكم تشكيلتي التي ستقودنا لأبعد الحدود


قاواوي - كخيار محتم لكنه يبقى أحسن حارس -

بوقرة - بدون تعليق -

عنتر يحيا - لازم يكون لازم -

بلحاج - لكن لا تعول عليه كثيرا في الدفاع يعني لازم تغطية معاه -

حليش vs زرابي - ثنائي تقدر تخير واحد من الزوج -

زاوي - يبقى أحسن مدافع محلي .. لكن حذاري -

زياني - مايسترو -

متمور - عول و زيد -

بزاز - جزايري و نص -

بوعزة - خفيف ظريف -

غزال - تقدر تقول راس حربة -



... هاد التشكيلة ماشي دفاعية و ليست أي شيء آخر

لكنها تبقى أحسن عناصرنا

منها و بوجود مدرب مليح - سعدان ممكن لكنو لم يقنعني -

يقدر يدير تشكيلة بزاف فور و يربح اي فريق


بقي في البقية تقدر تعتمد على

منصوري - الله غالب لصق ماكانش لي يدي بلاصتو + الأخلاق -

حاج عيسى - لي نشوفو أحسن وسط ميدان هجومي محلي !! -

غيلاس - شخصيا لم يقنعني -

+


جمهور متعقل يفهم معنى الكرة و النتيجة

يعني ماشي ديما خسارة و ماشي ديما ربحة

تشجيع حضاري : الجزائر فوق الجميع

+

الهول كاين كاين
+
تقبل أي نتيجة و التشجيع المتواصل

يعني ماشي

مع - إذا رابحين -

ضد - إذا خاسرين -

=


هكدا نقدروا نبينوا الغالط من الصح

أما إذا كملنا بهاد المستوى تاع بعض النمناصرين

للأسف ماشي قلال تقدر تقول الأعظمية

ما عندنا وين نروحوا

و هاداك الوقت ما نقدروش نلومو هاداك اللاعب ولا المدرب

لأنو نلومو نفسنا و من بعد نهدروا

اذا نخسروا نكسروا و نريبوا

هكدا جامي نقدموا


.... سلام